Наманган вилояти Учқўрғон туманида 22 апрель куни 38 ёшли она 4 ёшли фарзанди билан бирга ўзини дарёга ташлади. Бу ҳақда Миллий гвардия ахборот хизмати хабар берди.

Хабарга кўра, 22 апрель куни тунги соат 01:20 ларда Наманган вилояти Учқўрғон туманидан оқиб ўтувчи Норин дарёси устида жойлашган кўприк қирғоғига тушган нотаниш аёл фарзанди билан бирга ўзини сувга ташлаган. Бу вақтда ушбу ҳудудда хизмат олиб бораётган Миллий гвардия Қўриқлаш бошқармаси ходими ҳамда воқеа жойидан ўтиб кетаётган йўловчи фуқаро А.А. уни қутқариб, туман тиббиёт бирлашмасига олиб борган.

Маълум қилинишича, олиб борилган дастлабки суриштирувлар давомида ушбу аёл Учқўрғон туманида яшовчи, 1983 йилда туғилган фуқаро Х.М. бўлиб 2017 йилда туғилган фарзандини ўзига боғлаган ҳолда сувга ташлагани маълум бўлган. Ҳозирда мазкур ҳолат юзасидан Учқўрғон туман ИИБ томонидан суриштирув ишлари давом этмоқда.