Ўзбекистон аҳоли даромадлари ўртачадан юқори бўлган давлатлар қаторига чиқади

Ўзбекистон аҳоли даромадлари ўртачадан юқори бўлган давлатлар қаторига чиқади

Шавкат Мирзиёев инаугурация маросимида давлат иқтисоди ҳақида ҳам гапириб ўтди. Президент мамлакатдаги мавжуд ресурс ва имкониятларни сафарбар этган ҳолда аҳоли жон бошига тўғри келадиган ялпи ички маҳсулот ҳажмини янада ошириш мақсад қилинганини қайд этди.

«Насиб этса, 2030 йилга бориб, Ўзбекистон жон бошига ҳисоблаганда, аҳоли даромадлари ўртача кўрсаткичдан юқори бўлган давлатлар қаторидан ўрин эгаллайди. Бунга, аввало, хусусий секторни рағбатлантириш ва унинг улушини ошириш ҳамда тўғридан-тўғри хорижий инвестицияларни жалб этиш ҳисобидан эришиш кўзда тутилмоқда.

Жумладан, ‘хом ашёдан – тайёр маҳсулотгача’ деган тамойил асосида драйвер соҳаларда кластер тизимини ривожлантирамиз. Иқтисодиётда юқори ўсиш суръатларига эришиш учун, аввало, макроиқтисодий барқарорликни таъминлаб, инфляция даражасини белгиланган 5 фоизгача пасайтириш чоралари амалга оширилади.