Франция пойтахти Париж шаҳрида каратэ бўйича 2020 йилнинг илк нуфузли мусобақаси якунланди.

Ушбу Гран-при баҳсларида Ўзбекистон терма жамоаси аъзоларидан фақат Барно Мирзаева -61 кг вазн тоифасида кучли бешликдан ўрин эгаллаганлигини айтмаганда, вакилларимизнинг биронтаси 9-11 таликка ҳам кўтарила олишмади.

Шундай бўлса-да, асли ўзбекистонлик каратэчи Дархон Асадиловнинг ушбу халқаро турнир доирасида “2019 йилнинг дунёдаги энг кучли 12 нафар каратэчиси” номинантларидан бири, дея эътироф этилиши Ўзбекистон ҳам дунё каратэсида “борлигини” кўрсатди.

Айтиш лозимки, Тошкентда туғилиб ўсган Дархон илк каратэ сабоқларини Ўзбекистонда каратэ бўйича тажрибали тренер Жўра Маматқобиловдан олган. У бугунги кунда -60 кг вазн тоифасида Қозоғистон терма жамоаси сафида Токио олимпиадаси йўлланмаси учун кураш олиб бормоқда.

У жаҳон рейтингида етакчилик қилмоқда. Ушбу мусобақада “ўзбекистонлик” Дархон Асадилов 2-ўринни эгаллади.

Тўлқин РЎЗИЕВ