Қозоғистонда электр тармоқларини бошқариш бўйича масъул оператор KEGOC Қозоғистоннинг жанубий вилоятлари, Ўзбекистоннинг кўплаб вилоятлари ва бутун Қирғизистонни қамраб олган Марказий Осиё ягона электр тизимидаги ўчиш сабаблари тўлиқ тафсилотларини эълон қилди, деб хабар беради «Gazeta.uz».

Оператор маълумотларига кўра, 25 январь куни Нур-Султон вақти билан 11:59 (Тошкент вақти билан 10:59)да «Ўзбекистонда юз берган қисқа туташув туфайли Сирдарё ИЭСда 6 та энергоблокда ўчиш рўй берган ва бунинг оқибатида йўқотилган қувват жами 1500 мегаваттни ташкил қилган».

«Ўзбекистон энергетика тизимида юзага келган электр қуввати дефицити Ўзбекистон ва Қирғизистон энергия тизимлари билан параллел ишлашга уланган Қозоғистон энергетика тизимидан санкцияланмаган қувват олинишига олиб келган. Натижада 500 кВт кучланишли Шимол—Шарқ—Қозоғистон Жануби транзитида қувват кучланиши рўй берган ва ундан кейин ортиқча юкланиш содир бўлган», — дейилади хабарда.