Янги иш ҳафтаси Украинага ҳужум қилган ва бунинг учун санкцияларга дучор бўлган Россия фаол равишда ўзида қазиб олиб, чет элга сотаётган, захира ва ҳарбий қудратни ошираётган барча нарсалар нархининг навбатдаги сакраши билан бошланди. Бу ҳақда BBC news нашри хабар бермоқда.
 
Ўтган ҳафтада нефт нархи 20 фоизга ўсди, душанба куни биржалар очилиши билан эса деярли бир хил миқдорда кўтарилиб, бир баррел Брент учун 140 долларни ташкил қилди. Бу инқироздан олдинги 2008 йил июлидаги тарихий рекорддан бир неча долларга кам. Бир неча соатлик савдодан сўнг нарх тахминан 125 долларга қайтди, бу жума кунгидан 7 фоизга кўп.
 
Нархлар Ғарбнинг Россия нефтига эмбаргони муҳокама қилишда фаоллашгани сабабли ошиб бормоқда.
 
Россия нефт қазиб олиш бўйича Саудия Арабистони ва АҚШдан кейин дунёда учинчи ўринда туради. У кунига қарийб 11 миллион баррел нефт ишлаб чиқаради ва уларнинг 5 миллионга яқини, шунингдек, яна 2 миллион баррел нефт маҳсулотлари экспорт қилинади. Тахминан ярми Осиёга кетади.

Америка Қўшма Штатлари эмбаргони муҳокама қилиш ташаббускори, лекин улар кўп сотиб олмайдилар, Европа эса Россия нефт ва нефт маҳсулотларига жиддий қарам. У ҳали блокада ҳақида гапирмайди.
 
Россиянинг асосий нави бўлган Уралс нефти жаҳон нархлари каби тез ўсмаяпти, чунки харидорлар Россиянинг Украинага бостириб киришидан кейин ундан воз кечишди.

Уруш барча хом ашё нархларини кўтарди: ўтган ҳафтада никел 19 фоизга, алюминий 15 фоизга, рух 12 фоизга ва мис 8 фоизга қимматлашди.
 
Янги ҳафтанинг бошланиши янги рекордларни ваъда қилади. Душанба куни эрталаб никел яна 10% қўшилди, алюминий нархи эса биринчи марта бир тонна учун 4000 доллардан ошди. Россия дунёдаги барча алюминийнинг 6 фоизини, никелнинг тахминан 7 фоизини ва миснинг 3,5 фоизини ишлаб чиқаради.