Семизлик ва у билан боғлиқ касалликлар инсон умрини 3 йилдан 15 йилгача қисқартириши мумкин. Россиянинг Истеъмолчилар ҳуқуқларини ҳимоялаш ва сиҳат-саломатлик бўйича федерал назорат хизмати ана шундай статистикани тақдим этди.
Қайд этилишича, ортиқча вазн инсон умрининг ўртача 3-5 йилга, яққол семизлик эса 15 йилгача қисқаришига сабаб бўлади. Ҳар уч ўлимдан иккитасига ёғ алмашинувининг бузилиши ва семизлик олиб келяпти.
Федерал хизмат маълумотига кўра, Европанинг ривожланган мамлакатларида аҳолининг 15 фоиздан 25 фоизгачаси семизликка чалинган. Бутун дунёда болалар ва ўсмирлар орасида ҳам семизлар сонининг ортаётгани кузатиляпти: ривожланган давлатларда ўсмирларнинг ўртача 25 фоизи ортиқча вазнга эга.
Жаҳон соғлиқни сақлаш ташкилоти 2030 йилга бориб сайёрамиз аҳолисининг 41 фоизида ортиқча вазн бўлишини тахмин қилмоқда. Семизлик юрак-қон томир касалликларига, саратон ва диабетга олиб келади.