Самарқандда Ислом ҳамкорлиги ташкилоти ёрдамида Ислом илмий-тадқиқот маркази ташкил этилиши мумкин. Бу ҳақда Ўзбекистон Президенти вазифасини бажарувчи, Бош вазир Шавкат Мирзиёев билдирди, деб хабар бермоқда РИА Новости.

"Биз Самарқанд шаҳрида ислом дунёси олимлари ва донишмандлари меросини ўрганиш бўйича Ислом ҳамкорлиги ташкилоти ёрдамида Ислом илмий-тадқиқот марказини ташкил этиш таклифини билдирамиз", — деди Шавкат Мирзиёев Тошкентда ИҲТ ташқи ишлар вазирлари кенгашининг 43-сессияси очилиш маросимида.

Унинг сўзларига кўра, бундай марказнинг ташкил этилиши Ўзбекистоннинг ИҲТ ТИВКдаги "таълим ва маърифат – тинчлик ва бунёдкорлик йўли" шиори остидаги раислигининг устувор мақсадларидан биридир.

Шавкат Мирзиёев Ўзбекистон заминида Имом ал Бухорий, Имом ат Термизий, Абу Райҳон Беруний, ал Хоразмий, Имом ал Мотуридий каби ислом оламининг буюк ва машҳур намояндалари яшаб ўтишганини эслатиб ўтди.