Татаристонда 12 май мотам куни деб эълон қилинди. Путин ҳалок бўлган болаларнинг яқинларига ҳамдардлик билдирди

Татаристонда 12 май мотам куни деб эълон қилинди. Путин ҳалок бўлган болаларнинг яқинларига ҳамдардлик билдирди

Қозон шаҳридаги 175-сонли мактабдаги отишма пайтида ҳалок бўлганларнинг хотирага 12 май Татаристонда мотам куни деб эълон қилинди.

Ушбу қарор Татаристон президенти Рустам Минниханов томонидан қабул қилинган.

«Президент қарори билан Татаристонда 12 май мотам куни деб эълон қилинди», дейди президент матбуот хизмати раҳбари Лилия Галимова.

Галимова шунингдек, яқин вақт ичида республика аксилтеррор комиссиясининг йиғилиши ўтказилишини маълум қилди. Таълим муассасасидаги отишма пайтида ўқувчилар ва мактаб ўқитувчиларидан бири ўлдирилган. Ҳалок бўлганлар ва жароҳат олганларнинг аниқ сони аниқланмоқда.

Ҳужум 19 ёшли Илназ Гулявиев томонидан амалга оширилган ва у ҳибсга олинган. Илназ тўрт йил олдин ушбу мактабни тугатган.

Россия президенти ҳалок бўлган болаларнинг яқинларига ҳамдардлик билдирди

Россия президенти Владимир Путин Қозон шаҳридаги мактабдаги отишмада ҳалок бўлган болаларнинг яқинларига чуқур ҳамдардлик билдирди.

«Президент отиб ўлдирган болаларнинг қариндошларига чуқур ҳамдардлик билдиради», деди давлат раҳбари матбуот котиби Дмитрий Песков. Шунингдек, Путин жароҳат олган мактаб ўқувчиларига тезроқ тикланишларини тилаган.

Песковнинг сўзларига кўра, давлат раҳбари ҳозирда Кремлда. У ФХХ раҳбари Александр Бортниковнинг ҳисоботини эшитган, ҳукумат раҳбари Михаил Мишустин, бош вазир ўринбосари Татяна Голикова ва Фавқулодда вазиятлар вазирлиги раҳбари Евгений Зиничев билан телефон орқали суҳбатлашган. Президент ҳукуматга жароҳат олган болаларга тиббий ва психологик ёрдам кўрсатиш, ҳалок бўлганларнинг қариндошларига зарур кўмак беришни топширди.

Мишустин ва Голикова билан суҳбатда Фавқулодда вазиятлар вазирлигининг самолёти бортида шифокорлар, психологлар ва зарур тиббий асбоб-ускуналар билан бирга Қозонга учиб кетишга қарор қилган. Шунингдек, Таълим вазири Сергей Кравсов ва Соғлиқни сақлаш вазири Михаил Мурашко Татаристон пойтахтига боради.

Путин кун давомида Қозондаги вазият бўйича ҳукумат, тегишли вазирликлар ва махсус хизматлар раҳбарлари билан алоқада бўлиб туради.