Uzbekistan Airways Саудия Арабистонига рейсларни тўхтатди

Uzbekistan Airways Саудия Арабистонига рейсларни тўхтатди

Uzbekistan Airways авиакомпанияси 27 февралдан Саудия Арабистонининг Жидда ва Мадина шаҳарларига барча рейсларни вақтинчалик тўхтатди. Бу ҳақда авиакомпания матбуот хизмати хабар қилди.

Бу чора Саудия Арабистони ҳукумати зиёратчиларнинг мамлакатга киришини вақтинчалик тақиқлагани билан боғланган. Ушбу тақиқлов остига 25 та давлатдан келувчи, жумладан ўзбекистонлик турист ва зиёратчилар тушган бўлиб, у коронавирус тарқалиши хавфининг олдини олиш зарурати билан тушунтирилган. 
    
Шу билан бирга авиакомпания қисқа вақт ичида Саудия Арабистонидан ўзбекистонликларни қайтариш мақсадидагина ушбу мамлакатга бир нечта рейсни амалга оширади. 

Авиакомпания қўшимча маълумотлар учун Ўзбекистон мусулмонлари идорасининг 71-240-39-33 телефон рақамига ёки 78-140-02-00 орқали авиакомпаниянинг ягона алоқа марказига мурожаат қилиш мумкинлиги маълум қилди.