Bugun AOKAda Koronavirusga qarshi kurash shtabi a’zosi Rustam Ikromov ishtirokida brifing bo‘lib o‘tdi. Unda aholidan tushayotgan muhim savollarga javob qaytarildi:

Savol: Ekspress-test tahlili tartibi qanday va u kimlarda o‘tkaziladi?

Javob: Immunoglobulin M va G sinfiga kiruvchi antitanachalar tezkor testlar, ya’ni, sezgirligi 85% dan, spetsifikligi esa 95% dan kam bo‘lmagan ochiq va yopiq turdagi immunoferment tahlili to‘plamlari bilan aniqlanadi.

Bunda M sinfiga kiruvchi antitanalar yoki COVID-19 ga qarshi yig‘indi antitanachalar ijobiy bo‘lgan barcha bemorlar to‘g‘risida shoshilinch xabar Sanitariya–epidemiologik osoyishtalik markaziga beriladi va ular qo‘shimcha ravishda COVID-19 ga PZR tahlilida tekshiriladi.

PZR tahlilini javobi ma’lum bo‘lguncha tekshirilgan shaxslar uy karantinida bo‘lishadi.

PZR tahlili manfiy, lekin G sinfiga kiruvchi antitanachalar yoki COVID-19 ga qarshi yig‘indi antitanachalar tekshirish natijasi ijobiy bo‘lgan shaxslarda immunitet paydo bo‘lgan va COVID-19dan himoyalangan deb hisoblanadi.

PZR tahlili javobi musbat bo‘lganda tekshiriluvchi koronavirus infeksiyasi bilan kasallangan deb hisoblanadi va kasallik kechishi darajasiga qarab davolanishga yuboriladi.