Koreya Respublikasidan navbatdagi insonparvarlik yordami O‘zbekistonga yetib keldi. 

Seuldan bortida insonparvarlik yuklari bilan uchgan charter reys Toshkentga mahalliy vaqt bilan 13:00 da qo‘ndi.

Bu safargi yuklar O‘zbekiston Respublikasi Favqulodda vaziyatlar vazirligi xodimlari uchun mo‘ljallangan bo‘lib, ular 150 xil tibbiy himoya vositalaridan iborat. Ularni Janubiy Koreyaning Yong‘in instituti vakillari o‘zbekistonlik hamkasblariga beg‘araz asosda taqdim etdi.

Koronavirus pandemiyasi davom etayotganiga qaramay, joriy yilning aprel oyida O‘zbekiston Respublikasi Favqulodda vaziyatlar vazirligining Yong‘in xavfsizligi va favqulodda vaziyatlar ilmiy-tadqiqot instituti bilan Koreya Respublikasi Yong‘in instituti o‘rtasida memorandum imzolandi.

Shuningdek, 2021-2022 yillargacha ikki mamlakat o‘rtasida yong‘in xavfsizligi sohasida hamkorlik rejasi loyihasi tasdiqlanishi kutilmoqda.