«Qizil» va «sariq» hududlarda shanba va yakshanba kunlari buyum bozorlari yopiladi va jamoat transporti kamaytiriladi

«Qizil» va «sariq» hududlarda shanba va yakshanba kunlari buyum bozorlari yopiladi va jamoat transporti kamaytiriladi

O‘zbekistonda Respublika maxsus komissiyasining qaroriga muvofiq bir qator chora-tadbirlar belgilandi. Joriy yil 1 iyul sanasidan boshlab:

- respublikaning barcha hududlarida yirik buyum bozorlari hamda buyum savdosi bilan shug‘ullanadigan yirik savdo majmualari haftaning shanba va yakshanba kunlari sanitariya-dezinfeksiya ishlarini amalga oshirish uchun yopiladi;

- «qizil» va «sariq» hududlarda soat 07:00 dan 23:00 ga qadar jamoat joylarida uch kishidan ortiq to‘planish hamda 23:00 dan 07:00 ga qadar ko‘chalarda, ko‘p qavatli uylar va hovlilar oldida bo‘lish taqiqlanadi.

Bunda:

faqatgina fuqarolarning salomatligi yomonlashganligi, homiladorligi munosabati bilan shifokor ko‘rigidan o‘tish uchun davolash muassasasiga yoxud zarur dori-darmon xarid qilish maqsadida dorixonaga borib-kelishiga ruxsat beriladi;

mazkur talablarni buzgan shaxslarga nisbatan belgilangan tartibda ma’muriy javobgarlik choralari qo‘llaniladi.

Shuningdek, «qizil» va «sariq» hududlarda haftaning shanba va yakshanba kunlarida jamoat transporti harakati kamaytiriladi.