АҚШ президенти бир ҳафта муқаддам Конгресс томонидан қабул қилинган қонун лойиҳасига қарши бўлишига қарамасдан, «миллий бирликни сақлаб қолиш учун» тасдиқлашга мажбур бўлган. Бу ҳақида Associated Press агентлиги хабар бермоқда.

Доналд Трамп президентлик фаолияти давомидаги энг муҳим ҳужжатни имзолагани айтилмоқда. Оқ уй раҳбари Конгрессдан норозилигини изҳор қилишни ҳам унутмаган. 7 йиллик мунозаралардан кейин ҳалигача соғлиқни сақлаш тўғрисидаги қонун бўйича бир тўхтамга келолмагани учун Конгресс аъзоларини танқид қилар экан, АҚШ президенти сифатида Конгрессдан кўра бошқа мамлакатлар билан яхшироқ келишувларга эришиши мумкинлигини таъкидлаган.

Янги санкциялар пакети Кремлни АҚШ президенти сайловларига аралашуви, Украина ва Сурия уруши учун жорий қилинган. Қонундан Эрон ва Шимолий Кореяга қарши янги иқтисодий чекловлар ҳам ўрин олган.

Янги санкциялар Россиянинг энергетика ва мудофаа соҳаларини нишонга олган. Қонунда АҚШ президенти томонидан Россияга қарши санкцияларни юмшатиш ёки бекор қилиш фақат Конгресснинг рухсати билан амалга оширилиши ҳам белгиланган. Шунинг учун Трамп ушбу қонунни «ижроия ҳокимияти ваколатларини чеклаш»га тенглаштирган.

Янги қонунда Россиянинг энергетика соҳасига сармоя киритган, Сурия армиясини қурол билан таъминлашга кўмаклашган, Россиянинг мудофаа ва разведка ташкилотлари билан ҳамкорлик қилган шахслар ва ташкилотларга қарши 12 турдаги санкциялар қўлланилиши қайд қилинган.