Япония 72 йил аввал 70 мингдан 100 минг кишининг ҳаётини олиб кетган Хиросиманинг АҚШ томондан атом бомбаси билан бомбардимон қилиниши қурбонлари хотирасини бир дақиқалик сукут сақлаш билан ёд олди. Бу ҳақда «ТАСС» хабар бермоқда.

Хотира маросими Хиросима марказидаги Тинчлик боғида ўтмоқда, унда 80 та давлат вакиллари иштирок этмоқда.

Сукут сақлаш маҳаллий вақт билан соат 8:18:01 да бошланди — 1945 йил 6 августининг айнан шу сонияларида Хиросимада атом бомбаси портлаган эди.

Шаҳар мэри Кадзуми Мацуи ўз чиқишида барча мамлакатлар ядровий бомбадан воз кечиши лозимлигини таъкидлаб ўтди.