National Geographic журнали америкалик фотосуратчи Джон Стэнмейер суратга олган ўзбек тўйи фотосуратини дунёнинг энг яхши 57 фотосурати рўйхатига қўшди.

"Ака-ука куёв ва уларнинг қаллиқлари тўй маросимида. Тошкентдаги тўйхоналардан   бирида. Бугунги Ўзбекистон пойтахти бир вақтлар Буюк Ипак йўлида карвонлар тўхтайдиган жой бўлган", — деб изоҳ қолдирган Стэнмейер ўзининг Instagramдаги саҳифасида.

Фотосуратчи айтишига қарганда, у ўзбек тўйига тасодифан келиб қолган. Шаҳарни айланиб юрган вақтда унинг таржимони Азиз Холмурадов тўйхонага кириб келин-куёвни суратга олишни таклиф қилади. Маҳаллий фотосуратчи эса унга ўзининг "вспышка"сини бериб туради.

Жон Стэнмейер — бутун дунёга машҳур америкалик фотожурналист. Бир қатор халқаро мукофотлар лауреати. National Geographic билан бир неча йилдан буён ҳамкорлик қилиб келади. 2014 йилда фотография соҳасида энг нуфузли бўлган World Press Photo мукофотга сазовор бўлган. У Ўзбекистонга журналист Пол Салопек билан бирга келган эди.