АҚШнинг янги сайланган президенти мамлакатнинг Россия ва Хитойга қарши санкциялар қўллаш сиёсатидан воз кечиши мумкинлигини айтди, дея хабар бермоқда Guardian нашри.
Доналд Трамп матбуотга берган сўнгги интервьюсида Россияга қарши санкцияларни маълум муддат давомида сақлаб қолиш ҳақида гапирган. Аммо бўлажак президент иқтисодий чекловлар бекор қилиниши мумкинлигини ҳам ваъда қилган: «Агар муносабатлар яхшиланса ва Россия ҳақиқатдан ҳам бизга ёрдам берадиган бўлса, буюк ишларни амалга ошираётганларга қарши нима учун санкциялар қўллаш керак?», – деб айтган 20 январь куни ўз вазифасига киришадиган президент Wall Street Journal'га берган интервьюсида.
Доналд Трамп Россия билан яхши муносабатлар ўрнатиш ҳақида олдин ҳам кўп маротаба таъкидлаган ҳамда Владимир Путинни «ғоятда ақлли» деган сифат билан мақтаган эди. «Улар мен билан кўришишни исташини тушунаман ва мен билан ҳаммаси аъло даражада», – деб айтган жаноб Трамп ўз нутқида.
Эслатиб ўтамиз, ўтган йилнинг 8 ноябрь куни бўлиб ўтган сайловда ғалаба қозонган Доналд Трамп 20 январь куни АҚШ президенти сифатида қасамёд қилади.