Канадалик шифокорлар ёш онанинг ҳаётини асраб қолиш учун қалтис ишга қўл уришди, дея хабар бермоқда Guardian​ нашри.

Ўтган йилнинг апрел ойида Мелисса Бенуа ўткир ўпка инфекцияси билан Торонтодаги шифохонага олиб келинган. Унинг ҳаётини асраб қолишнинг ягона йўли бошқа кишининг ўпкасини кўчириб ўтказишдан иборат бўлган. Аммо ўша вақтда трансплантация учун донор топилмаган.

Шифокорлар ўпкаси ишдан чиққан беморнинг ҳаётини сақлаб қолиш учун ўпкани олиб ташлашга қарор қилишади. Тиббиёт тарихида ҳали амалга оширилмаган тажриба учун жарроҳлар таваккал қилишади. Апрелнинг ўрталарида 13 нафар шифокордан иборат жамоа 9 соат давом этган жарроҳлик амалиёти ўтказади.

32 ёшли аёлнинг ўпкаси танасидан ажратилиб олинади. Кислород билан таъминлайдиган митти сунъий ўпка беморнинг юрагига уланади. Олти кундан сўнг иккита донор топилади ва шифокорлар ўпкани кўчириб ўтказиш амалиётини бажаришади. Беморнинг қалтис амалиёт учун рухсат берган турмуш ўртоғи айтишича, у уч ёшли фарзандини ўйлаб бунга қўл урган.

Бир неча ой касалхонада даволанган Мелисса Бенуа ҳозир ўзи мустақил ҳаракатланмоқда. Касаллик унинг буйрагига ҳам зарар етказгани айтилмоқда. Эндиликда шифокорлар Бенуада буйрак кўчириб ўтказиш амалиёти ўтказилиши учун тайёргарлик кўришмоқда.