АҚШ президенти НАТО иттифоқи номига айтган сўзларидан воз кечганлигини эълон қилди, дея хабар бермоқда Guardian ​ нашри.

Доналд Трамп сайловолди кампания пайтида НАТО ҳарбий блокини кўп марта танқид қилган ва уни «эскириб қолган» тузилма деб аташга журъат қилган эди. АҚШ президнети чоршанба куни Оқ уйда НАТО бош котибини Женс Столтенберг билан учрашган. Суҳбат давомида Трамп НАТО борасидаги илгариги позицияси ўзгарганини маълум қилган.

Доналд Трампнинг сайловолди кампанияси вақтида НАТО номига ёғдирган танқидлари халқаро ҳарбий блок аъзоларини ташвишга солган эди. АҚШ раҳбарининг НАТОга нисбатан янгича позицияси Россия билан алоқалар кескинлашган бир даврда юзага чиқмоқда.

НАТО бош котиби билан суҳбатда Доналд Трамп ҳарбий иттифоқни «халқаро хавфсизлик ва тинчлик ҳимоячи» сифатида эътироф этган. «Мен уни эскирган деб айтган эдим. У энди эскириб қолган эмас», – дея олдинги фикри ўзгарганини маълум қилган Оқ уй раҳбари.

Доналд Трамп ва Женс Столтенберг ўртасидаги учрашув АҚШ давлат котибининг Москвада Россия ташқи ишлар вазири Сергей Лавров ва президент Путин билан ўтказилган музокараларидан кўп ўтмай содир бўлган. Рекс Тиллерсон АҚШнинг ўтган ҳафтада Сурияга қилган ҳужуми борасида Россиянинг қаршилигига дуч келган.

Америкалик дипломатнинг Россия президенти билан музокаралари натижаси номаълумлигича қолмоқда. Доналд Трамп мазкур учрашувга «муваффақиятли ўтган» дея баҳо берган бўлсада, Россия ташқи ишлар вазири Лавров томонлар умумий келишувга эриша олмаганларини маълум қилган.