Ижтимоий тармоқларда шу кунларда Ўзбекистон Президенти порталига антиқа илтимос билан мурожаат қилган фуқаронинг хати қизғин муҳокама қилинмоқда. Тошкент шаҳрининг Миробод тумани истиқомат қилувчи фуқаро ўз мурожаатида президентдан автомобиллар йўлларини таъмирлашни сўрайди. Бундан ташқари, телевизорда чемпионлар лигаси учрашувлари намойиш этиладиган кунларда тунда футбол томоша қилаётганлиги учун эрталаб ишга кечроқ боришга рухсат сўрайди. “...сал эрталаб ухлаб боришга, масалан 11ларда боришга рухсат берсангиз, ушбу ҳолат инсон организмини тўлиқ тикланиб ўзига келиб олишига ёрдам бўларди, докторларнинг айтишича инсон кунига 8 соатдан кам бўлмаган вақтда ухлаб олиши зарур...”, деб ўз илтимосини асослашга ҳаракат қилади мурожаатчи. Хатнинг сўнгида айлана автойўлга электр поезди қурилиши танқид қилинади ва унинг ўрнига метро қуриш таклиф этилади.
Таъкидлаб ўтиш лозимки, ҳукумат порталига келиб тушган ноодатий мурожаатларнинг биринчиси бу эмас. Ўтган муддат давомида мурожаатчиларнинг бири автомобилларга хизмат кўрсатиш шохобчаси қуриш ниятида бировнинг жойини олиб беришни сўраган бўлса, яна бири муносиб турмуш ўртоқ сўраб хат ёзган.