Венесуэлада бир неча ҳафтадан бери ҳукуматга қарши давом этаётган намойишлар ва тартибсизликларга мамлакат президенти Николас Мадуро муносабат билдирди, дея хабар бермоқда Guardian​  нашри.

Намойишчиларни ХХИ аср фашистларига тенглаштирган президент ҳукумат вакиллари ва уларнинг оила аъзоларини Гитлер Германиясидаги «бечораҳол» яҳудийларга қиёслаган. Давлат телеканаллари орқали намойиш этилган ҳукумат мажлисида Мадуро чоршанба оқшомига режалаштирилган норозилик намойишлари Иккинчи жаҳон урушидан олдинги Европада фашизмнинг бош кўтаришини эслатиб юборганини таъкидлаган.

“Биз ХХИ асрда Гитлер таъқибига учраган янги яҳудийлармиз. Биз Довуднинг сариқ юлдузини кўтариб юрмаймиз. Инсон қадр-қиммати учун кураш истаги билан тўлган қип-қизил юракларни олиб юрамиз. Биз уларни – ХХИ аср нацистларини мағлуб этишимиз керак”, деб айтган Венесуэла раҳбари.

Венесуэлада апрел ойининг илк ҳафтасидан бери деярли ҳар куни ҳукуматга қарши намойишлар бўлиб ўтмоқда. Тўқнашувларда ҳозиргача 40 нафарга яқин одам ҳалок бўлгани айтилади. Мухолифат Мадурони сайловни кечиктириш орқали диктаторликка интилиш ва конституцияни ўзгартиришга уринишда айбламоқда.

Президентнинг бундай муносабатига дунёнинг турли бурчакларида яшаётган венесуэлаликлар томонидан ижтимоий тармоқлар орқали ҳукумат вакиллари номига ҳақоратлар ёғдириши сабаб бўлган.