Европа тикланиш ва тараққиёт банки томонидан шакллантирилган умумий миқдори $1 млрд бўлган «Бирдамлик пакети» ҳисобидан тўртта ўзбек тижорат банкларига умумий қиймати 220 млн. АҚШ доллари бўлган кичик ва ўрта бизнес лойиҳаларини молиялаштириш учун кредит линиялари ва савдони молиялаштириш линиялари тақдим этилади. Бу ҳақда инвестициялар ва ташқи савдо вазирлиги маълум қилди.
Жорий йилнинг 7 апрель куни инвестициялар ва ташқи савдо вазири Сардор Умрзоқов ЕТТБ президенти Сума Чакрабати билан видеоконференция орқали мулоқотида ушбу масала муҳокама қилинган.
Шу билан бирга, аҳоли ва корхоналар томонидан тўлаб бориладиган коммунал тўловлар тушумларини пасайиши сабабли қийинчиликка дуч келган ҳудудий коммунал корхоналарнинг айланма капиталини қўллаб-қувватлаш учун ЕТТБ 100 млн. АҚШ доллари миқдоригача бўлган молиялаштиришни тақдим этиш масаласини кўриб чиқмоқда.