Ўтган ҳафтада ҳиндуийлар Гандҳима байрамини нишонлади, Ироқда қарийб икки ой давом этган норозилик намойишларидан кейин бош вазир Одил Абдул Маҳдий истеъфога чиқди, Ню-Жерсида кучли қор ёғди, НАТОга аъзо давлатлар раҳбарлари Англиянинг Уотфорд шаҳрида учрашди. Қароргоҳи Ню-Йоркда жойлашган AP – Associated Press халқаро агентлиги ўтган ҳафта бутун дунёда содир бўлган шу ва бошқа воқеаларнинг ўз наздидаги энг муҳимларига диққат қаратди.
Кобулдаги маҳаллий қочқинлар лагеридаги афғон қизалоқ нон еяпти. Афғонистон ичида қочқин бўлган ўн минглаб кишилар энг асосий шароитлари ҳам бўлмаган лагерларда жон сақлайди. 2019 йил 30 ноябр, шанба.
Непал пойтахти Катмандудан 128 км жанубдаги Бариярпур шаҳрилик қассоб Гандҳима маросимида ҳайвонларни сўйиб қурбонлик қилишга тайёрланяпти. Юз минглаб ҳиндуийлар ушбу маросимда қатнашиш ва минглаб ҳайвонларнинг қурбонлигига гувоҳ бўлиш учун йиғилади. 2019 йил 3 декабр, сешанба.
Қишлоқ аҳли Уттар-Прадеш штати, Канпур шаҳри яқинидаги сув ҳавзасида сув каштанларини йиғиб юрибди. Ҳиндистонда кунига 5-6 соат сарфлаб, сув ўсимликларини терадиган бундай ишчилар кунига 250 рупий (3,5 АҚШ доллари) миқдорида пул топади. 2019 йил 4 декабр, чоршанба.
Аксилҳукумат намойишчилар Бағдоддаги Таҳрир майдонига яқин бино устида мамлакат байроғини ҳилпиратяпти. Ироқ парламенти икки ойлик зўравонликлар ва ҳукуматга қарши тўхтовсиз намойишлар ортидан ўтган якшанба куни бош вазир Одил Абдул Маҳдийнинг истеъфосини қабул қилди. 2019 йил 1 декабр, якшанба.
Венесуэла Миллий Ассамблеяси президенти ва ўзини мамлакатнинг муваққат президенти деб эълон қилган Хуан Гуайдо Каракасдаги матбуот анжуманига келяпти. Венесуэлада йил бошидан бери сиёсий инқироз давом этмоқда. 2019 йил 1 декабр, якшанба.
Серфер Англия шимолидаги тарихий Тайнмаус қишлоғи қирғоғида севимли машғулоти билан шуғулланяпти. 2019 йил 3 декабр, сешанба.
Бўрон вақтида Марселнинг эски порти ҳудудида соябон тутиб кетаётган кишилар. Францияда олинган бу сурат кўзгу ёрдамида ишланган. 2019 йил 1 декабр, якшанба.
Сассекс электр таъминоти компанияси ишчиси Ню-Жерси штатига қарашли Вернон шаҳарчасида электр қувватини тиклаш учун ҳаракат қиляпти. Охирги ҳафтада ёққан қор Ню-Жерсининг шимоли-ғарбий қисмларини электр энергиясиз қолдирди. 2019 йил 3 декабр, сешанба.
Англиянинг Уотфорд шаҳрида НАТО (The North Atlantic Treaty Organization – Шимолий Атлантика Ҳарбий Ташкилоти) етакчилари учрашиб, ўзаро суратга тушиб бўлганидан сўнг ташкилот бош котиби Йенс Столтенберг (чапда) АҚШ президенти Доналд Трамп билан суҳбатлашмоқда. Чоршанба куни йиғилишда чиқиш қилган Франция президенти “ҳарбий иттифоқ мия фалажлигини бошдан кечираётгани”ни айтиб танқид қилди. Аммо Столтенберг бу гапни рад этиб, ташкилот замонавий таҳдидларга мослашаётганини айтди. Орқа қаторда чапдан ўнгга: Франция президенти Эмануэл Макрон, Норвегия бош вазири Эрна Солберг, Германия канцлери Ангела Меркел, Полша президенти Анжей Дуда ва Греция бош вазири Кириакос Митсотакис. 2019 йил 4 декабр, чоршанба.