Россиянинг энг йирик алоқа операторларидан бири «Мегафон» компанияси Ўзбекистоннинг Ucell алоқа операторини сотиб олгани ҳақида Дарё.уз янгилиги асосида хабар берган эдик.

Ўзбекистон Давлат активларини бошқариш агентлиги Kun.uz’га хабар беришича, «Мегафон» компанияси Coscom уяли алоқа операторини (Uсell бренди) сотиб олмади.

«Юз фоиз давлат улуши бизнинг қўлда, ҳеч нарса сотилмади», - дея агентлик вакили Kun.uz’га изоҳ берди. Шунингдек, унинг аниқлик киритишича, давлат операторни сотишни режалаштирмаяпти ҳамда сотув бўйича музокаралар олиб бормаяпти.

Telia Швеция-Финляндия ширкати 2018 йил декабрь ойида Ўзбекистоннинг телекоммуникация бозорига кириш билан боғлиқ коррупцион можародан сўнг Uсell’даги ўз улушини давлатга сотди. Компания 2015 йил охиридаёқ «Евросиё» макроминтақасидаги ўз активларини сотиб юбориш ниятида эканини билдирган.

Эслатиб ўтамиз, Алишер Усмоновнинг USM Holdings’и «Мегафон»нинг назорат қилувчи акциядори ҳисобланади. Аввалроқ, ОАВ Усмоновнинг тузилмаси Uсell’ни сотиб олишни режалаштираётгани ҳақида хабар берган эди, аммо бу маълумот расман тасдиқланмади.