Amerika Qo‘shma Shtatlari H-1B ishchi vizalarini berishni yana kuchaytirdi, deb xabar qildi mamlakat Ichki xavfsizlik vazirligi.

Xususan, chet ellik ishchilar yollanishi mumkin bo‘lgan "maxsus kasblar" soni kamayadi.

Qo‘shma Shtatlarda ishchi vizalari bo‘yicha minimal miqdordagi xodimlarni ish bilan ta’minlaydigan va o‘zlarining asosiy ishlarida boshqa mamlakatlarda autsorsing xizmatlariga tayanadigan kompaniyalar ustidan nazorat kuchaytiriladi.

Bundan tashqari, kompaniyalar chet elliklarga ko‘proq pul to‘lashga majbur bo‘ladilar, bu esa ishchi viza dasturining jozibadorligini pasaytiradi va vazirlik fikriga ko‘ra, past malakali xorijliklarning amerikaliklardan ish olib ketishining oldini oladi.

Ba’zi yangi qoidalar kelayotgan payshanba kuni (8 oktyabr) kuchga kiradi, boshqalari ikki oy ichida.

"Kompaniyalardan haqiqiy ishchilarga haqiqiy ish takliflarini berish talab qilinadi", deyiladi vazirlik bayonotida.

Vazirlik ma’lumotlariga ko‘ra, yangi qoidalar Qo‘shma Shtatlardagi ishchi vizalari kerak bo‘lgan chet elliklarning uchdan bir qismiga ta’sir qiladi. Ushbu qarorga, boshqalar singari, sudda shikoyat qilinishi mumkinligi aytilgan.

Donald Tramp ma’muriyati bir necha bor ishchi viza rejimini kuchaytirish choralarini ko‘rgan. Iyun oyida Tramp amerikaliklar uchun ish joylarini bo‘shatish maqsadida bir qator vizalar berilishini to‘xtatib turish to‘g‘risidagi bayonotga imzo chekdi. Tramp H-1B, H-2B, J va L vizalarini 2020 yil 31 dekabriga qadar to‘xtatib turishni buyurdi. Biroq, San-Fransisko sudi ushbu qarorni oktyabr oyi boshida qisman to‘sib qo‘ydi.