Yevropa Parlamenti Aleksandr Lukashenkoni qonuniy prezident deb tan olmadi va Muxolifatning Muvofiqlashtiruvchi kengashini Belorusning muvaqqat hukumati deb atadi.
Deputatlar 9 avgust kuni Belorusdagi saylov natijalarini tan olishdan bosh tortdilar va Aleksandr Lukashenkoni hokimiyatni tinch yo‘l bilan topshirishga chaqirdilar. Yevroparlament tinch namoyishchilarga qarshi zo‘ravonlik qo‘llanilishini qoraladi. Rezolyusiyada Belorus oppozitsiyasining Muvofiqlashtiruvchi kengashi "demokratik o‘zgarishlarni talab qiladigan odamlarning vaqtinchalik vakili" deb ataldi.
Yevropa parlamenti deputatlari saylovlarni soxtalashtirishda aybdor bo‘lgan barcha shaxslarga, jumladan Lukashenkoga qarshi shaxsiy sanksiyalar qo‘llanishini qo‘llab-quvvatladilar.
Shuningdek, deputatlar Rossiyaning Belorus ichki ishlariga "gibrid aralashuvi" ni qoraladi.
Qaror maslahat xarakteriga ega va qonuniy kuchga ega emas.