Farg‘ona viloyatida tez tibbiy yordam bo‘limlari va shifoxonalarning moddiy–texnik bazasini mustahkamlash, tibbiyot xodimlarining aholiga munosib xizmat ko‘rsatishini ta’minlash maqsadida viloyat hokimligi tomonidan mahalliy byudjet hisobidan shahar va tuman tibbiyot birlashmalariga 40 dona “Damas” rusumidagi maxsus avtomobili taqdim etildi.
Farg‘ona viloyati sog‘liqni saqlash boshqarmasi axborot xizmatining ma’lum qilishicha, natijada viloyatdagi tez tibbiy yordam avtomobillarining soni 400 tadan oshgan.
Viloyat hokimining birinchi o‘rinbosari M.Ubaydullayev va sog‘liqni saqlash boshqarmasi boshlig‘i X.Mamajonovlar mazkur avtomashinalarni topshirish jarayonida ular aholiga ko‘rsatilayotgan tibbiy xizmat sifatini oshirishiga ishonch bildirdi.