Fransiya prezidenti Emmanuel Makron koronavirus epidemiyasi hali boshlanmagani va unga qarshi kurashish lozimligi haqida bayonot berdi.

Makron bu haqda koronavirusdan zararlangan fransuz fuqarolaridan biri vafot etgan Parijdagi kasalxonani ziyorat qilganidan keyin gapirdi va inqiroz boshlanayotganini e’lon qildi. 

“Epidemiya kelyapti. Bizning burchimiz – unga qarshi turish”, dedi u.   

Bugun, 27 fevral kunining o‘zida Yevropaning Norvegiya, Daniya va Estoniya davlatlarida ham koronavirusdan zararlangan ilk bemorlar qayd etildi. Saudiya Arabistoni esa ayni kasallik xavfi tufayli mamlakatga umra va sayohat vizalari bilan kirishga vaqtinchalik taqiq o‘rnatdi. 

So‘nggi ma’lumotlarga ko‘ra, Xitoyning Uxan shahrida 2019 yil oxirida paydo bo‘lgan yangi turdagi COVID-19 koronavirusidan shu paytgacha 82 171 kishi zararlangan, ulardan 2 804 nafari vafot etgan, 33 129 kishi esa tuzalib ketgan.