23 iyul, payshanba kuni Markaziy bank asosiy stavkani ko‘rib chiqish bo‘yicha navbatdagi Boshqaruv yig‘ilishini o‘tkazdi. Yig‘ilishda Markaziy bank Boshqaruvi asosiy stavkani 15% darajada o‘zgarishsiz qoldirdi.
Yil boshidan beri Markaziy bank asosiy stavkani bir marta 14 aprel kuni 1% ga tushirgan edi.
Shuningdek, Markaziy bank yil yakuni bo‘yicha inflyasiya prognozini 11-12,5 foiz darajasida o‘zgartirishsiz saqlab qoldi.
II chorakdan boshlab inflyasiya darajasi o‘tgan chorakka nisbatan biroz ko‘tarildi va iyun oyi yakunlari bo‘yicha 14,2 foizni tashkil etdi. Joriy yil ikkinchi choragida narxlarning o‘sishiga oziq-ovqat mahsulotlari va qurilish materiallariga bo‘lgan yuqori talab hamda iyun oyida meva va sabzavotlar narxining mavsumiy pasayishining kutilganidan ko‘ra sekinroq bo‘lishi kabi omillar oshiruvchi bosim ko‘rsatdi.
Ikkinchi chorakda bazaviy inflyasiya nisbatan yuqori o‘sish sur’atiga ega bo‘ldi va iyun oyida yillik 13,8 foizni tashkil etdi.