НАТО мутахассислари Ўзбекистонда машғулот ўтказди

28.09.2018 | Ўзбекистон | 2549

Ўзбекистон Қуролли Кучлари академиясида 24-27 сентябр кунлари НАТОнинг Бирлашган кучлар қўмондонлиги штаб-квартираси мутахассислари томонидан руҳий ва ахборот амалиёти мавзусида машғулотлар бўлиб ўтди. Бу ҳақда Мудофаа вазирлиги матбуот хизмати хабар қилди.

Ўқув машғулотлари академиянинг профессор-ўқитувчилари учун ўтказилди. Тўрт кун давомида НАТО Бирлашган кучлар қўмондонлиги майори Уард Мишел-Терезе, подполковниклар Рузич Дроган ҳамда Сиверцен Гуннер маъруза қилиб, ўқитувчиларнинг малакасини ошириш бўйича маслаҳатлар беришди.

Ўзбекистон Қуролли Кучлари академияси кўплаб халқаро ташкилот ва етакчи хорижий мамлакат армияларининг таълим муассасалари билан ҳамкорликни йўлга қўйган бўлиб, ҳарбий кадрларни малакасини ошириш йўлида бу каби ўқув машғулотларини мунтазам ташкиллаштириб келади.

Академияда НАТОнинг “Мултимедиа бурчаги” ҳам ташкил этилган. Мазкур бурчакдан ўрин олган қўлланма ва китоблар асосан рус ва инглиз тилида бўлиб, уларда қуролли кучларни қўллар стратегияси ва тактикасини янада такомиллаштириш, жанговар операцияларни олиб боришнинг хорижий тажрибалари ҳақида маълумотлар берилган.