Лондон мэри Содиқ Хон Буюк Британия «шафқатсиз ва шармандали» ҳаракатларни амалга ошираётган АҚШ президенти Дональд Трампнинг ташрифини рад этиши кераклигини таъкидлади. Бу ҳақда Standard нашри хабар бермоқда.

Мамлакат парламентида Трампнинг қиролича Елизавета II таклифига асосланган Буюк Британияга ташрифи масаласи 20 февраль куни кўриб чиқилиши режалаштирилган. Муҳокама олдидан Содиқ Хон мазкур ташриф бўйича ўз фикрини билдирди.

Хоннинг айтишича, Трампнинг АҚШга 7 та мусулмон давлати фуқароларининг киришини вақтинчалик тақиқлаш ҳақидаги фармони "АҚШ президенти оёғи остига қизил гиламчани тўшамасликка" етарлича асос бўлади.

"Мен Американи, америкаликларни яхши кўраман ва давлатларимиз ўртасида ўзига хос  муносабатлар – бу яхшидир. Агар сиз кимдир билан дўст бўлсангиз, у билан ўзига хос алоқаларингиз бўлса, албатта сиз уни бир-бирингиз турли фикрларда бўлсангиз ҳам қўллаб-қувватлайсиз, бироқ улар ноҳақ бўлганларида, уларга бу ҳақда айтасиз", деб айтди Лондон мэри. 

Маълум қилинишича, АҚШнинг аввалги президентлари Буюк Британия қироличасидан таклифни узоқроқ муддат давомида кутган. Жумладан, Буюк Британияга Барак Обама президент бўлганидан 758 кун ўтиб, кичик Жорж Буш 978 кундан сўнг таклиф этилган. Трампга эса бунинг учун 7 кун кифоя қилган.

Аввалроқ Британия парламенти Трампнинг Буюк Британияга киритилишини тақиқлаш тўғрисидаги петицияни кўриб чиқишдан бош тортганди