Франциянинг «Миллий фронт» партияси раҳбари, Францияда шу йилнинг май ойида ўтказиладиган сайловда ғалаба қозониш учун асосий номзод сифатида кўрилаётган Марин Ле Пен Ливанга ташрифи давомида мамлакатнинг энг катта диний уламоси билан учрашди. Бу ҳақида Al Jazeera​ телеканали хабар бермоқда.

Мазкур учрашувда Марин Ле Пен юқори мартабали ислом уламосига ҳурмат юзасидан бошига рўмол ўрашдан бош тортгани кўпчиликнинг эътирозига сабаб бўлди. “Франция Трампи” лақабини олган Ле Пен Ливанга сафарининг сўнгги кунида – сешанба куни Ливан суннийларининг раҳбари Шайх Абдуллатиф Даряннинг Байрутдаги идорасига ташриф буюрган.

Бўлажак сайловларда ғалаба қозониш учун рақибларига қараганда яхшироқ имкониятга эга бўлиб турган исломофоб номзоднинг хатти-ҳаракатлари мусулмонларнинг норозилигига сабаб бўлган. Таҳлилчилар фикрича, охирги бир неча кун Франция полицияси томонидан текширувларга юз тутган Ле Пен ўзининг исломофобияга мойил тарафдорларини рағбатлантириш ва исломий анъаналарни ҳурмат қилмаслигини намойиш этиш учун рўмол ўрашдан бош тортган. 

Душанба куни Франция полицияси «Миллий фронт»нинг Париждаги офисларида коррупсия билан боғлиқ текширувлар бошлаган эди. Ғарблик сиёсатчи аёллар юқори мартабали мусулмон уламолар билан учрашувларда бошларини рўмол билан беркитиб олишлари ислом динига нисбатан ҳурматни ифодалар эди.

Икки йил муқаддам АҚШнинг собиқ биринчи хоними Мишел Обаманинг Саудия Арабистони қироли ҳузурига боши очиқ ҳолда ташриф буюриши кўпчиликнинг эътирозига сабаб бўлган эди.

Журналистларнинг саволларига жавоб берар экан, франциялик сиёсатчи бундан аввал Мисрнинг Ал-Азҳар университети раҳбари билан учрашувга ҳам бошлари очиқ ҳолда борганини таъкидлаган. Марин Ле Пен ислом уламоси билан учрашувда амал қилиниши лозим бўлган мусулмончилик одоблари ҳақида аввалдан огоҳлантирилган, аммо унинг ўзи муфтий билан учршувга рўмолсиз боришга қарор қилган.