Мажруҳ қўл панжасидаги оғриқдан 16 йил давомида азоб чекиб келган англиялик охири уни мустақил тарзда кесиб ташлади. Бунгача у бир неча бор шуни сўраб тиббиёт ходимларига мурожаат этган, аммо шифокорлар беморнинг қўлини кесишга рози бўлмаган эдилар. Бу тўғрида Метро УК нашри хабар бермоқда.

Девон графлигида яшовчи 44 ёшли собиқ механик Марк Годдард мототциклда ҳалокатга учрагач, чап қўли майиб бўлиб қолган ва доим бундан азият чекиб келган. Шифокорлар қўллаган муолажалар айтарли наф бермагач, у панжасини кесишларини илтимос қилган. Аммо рад жавобини олавергач, буни ўзи амалга оширишга қарор қилди.

Бунинг учун Годдард ўз уйининг орқа ҳовлисида болта, занжир ва эски тўсиндан қўлни чопиш учун мослама ясади. Бироқ қўлбола мослама унинг билагини бутунлай чопиб ташлай олмади. Шунда Марк бошлаган ишини пичоқ ёрдамида охирига етказди. Кейин эса, шифокорлар хабар топишса қайтадан тикиб қўйишларидан чўчиб, кесиб ташланган қўл панжасини ёндириб юборди.

Годдард бу жараёнда бир литрдан кўпроқ қон йўқотган эди, шунинг учун уни зудлик билан шифохонага ётқизишди.

«Агар шу даҳшатли оғриқни касалхона шароитларида бартараф этишнинг иложи бўлганида эди, мен бу қалтис ишга қўл урмаган бўлар эдим, – дейди собиқ механик. – Бироқ бу ягона чора бўлиб чиқди. Умид қиламанки, энди ўзим ва оила аъзоларимиз хотиржам яшай оламиз».

Лекин панжасини кесиб ташлагани билан, у қўлининг қолган қисмидаги оғриқдан қутула олмади. Годдард шифокорларга ултиматум қўйган: агар шифохонада бу оғриқларни тўхтата олишмаса, у қўлини энди тирсагидан чопиб ташламоқчи!

Ўзининг айтишича, Марк бир неча марта психиатр тестларидан ўтган ва ақли жойида, дея эътироф этилган.