Янги президентнинг қасамёд маросимидаги чиқиши Франция президентларига хос бўлмагани билан кўчиликнинг эътиборини тортди. Якшанба куни Франция президенти сифатида қасамёд қилган Эммануэл Макрон маросимга атиги 450 евро турадиган костюмда келиши Франция жамоатчилиги учун янгилик бўлди.

Франция раҳбари, ўтмишдошларидан фарқли равишда, қасамёд маросимига лимузинда эмас, ҳарбий автомобилда келган. Эммануэл Макрон урушда ҳалок бўлган францияликларни ёд этиш учун Елисей саройининг Ғалаба аркасидаги номаълум аскар қабрини зиёрат қилар экан, ёмғирли ҳавода соябондан фойдаланмасликни афзал кўрган.

Кузатувчилар фикрича, президентнинг хатти-ҳаракатлари унинг камтар раҳбар бўлишидан далолат беради. Одатда, Франция президентлари шоҳона ҳаёт кечиришлари билан машҳур бўлишарди. 2007 2012-йилларда Францияни бошқарган Николя Саркози дабдабали ҳаёт тарзини хуш кўргани туфайли “ҳашаматпараст президент” сифатида ном чиқарган эди.

Кеча Макронга Франция президентлигини топширган Франсуа Олланд эса сартарошга бир ойда 10 минг евро сарфлаши ҳақида миш-мишлар тарқалиб, жамоатчилик танқидига учраган эди. Сайлов арафасида коррупцион можаролар гирдобига тортилган номзод Франсуа Фиён бўлса бадавлат бизнесменлардан ҳар бири 13 минг евро турадиган костюмни ҳадя сифатида олишда айбланган эди.