Душанба куни ўзининг Франция президенти сифатидаги илк сафарини Германиядан бошлаган Эммануэл Макрон Евроиттифоқ «чуқур ислоҳотлар»га муҳтожлиги ҳақида гапирди, дея хабар бермоқда Russian Today ​ телеканали.

Берлин шаҳрида Германия канцлери Ангела Меркел билан бўлиб ўтган матбуот анжумани чоғида Франция президенти Евроиттифоқ шартномасини ислоҳ қилиш ғояси тақиқланмаслигини эътироф этган. «Ўтмишда иттифоқ шартномасини ўзгартиришга Франция томонидан тақиқ қўйилган эди. Энди бундай бўлмайди», – деб айтган Франция президенти.

Германия билан ҳамкорликда ишлашдан мамнунлигини изҳор қилар экан, Макрон иттифоқда ислоҳотлар қилиш учун Париж ва Берлин биргаликда ишлаши лозимлигини қайд этган. Франция раҳбарининг фикрларини қўллаб-қувватлар экан, Ангела Меркел шартномани ўзгартириш фақатгина евроҳудудни кучайтириш мақсадида амалга оширилишини ва ўзгаришлар қисқа давр ичида бўлмаслигини айтган.

Германия канцлери Макроннинг ташрифини Евроиттифоқ икки асосий етакчилари ўртасидаги қалин дўстлик рамзи бўлганини эътироф этган. «Ҳар иккимиз ўз мамлакатларимиз манфаатларини ифода этамиз. Аммо Германиянинг манфаатлари Франциянинг манфаатларига табиий тарзда боғланган. Фақатгина қудратли Франция мавжуд бўлса, Европага яхши бўлади», – деб айтган Меркел хоним.

Эммануэл Макрон 7 май куни Франция президент этиб сайланган эди. Франция тарихидаги энг ёш президент бўлишга эришган сиёсатчи 14 май куни қасамёд қабул қилган ва эртаси куниёқ Германияга сафар қилган. Ўша куннинг ўзида янги президент Республикачилар партияси вакили Эдуард Филиппени Франция бош вазири қилиб тайинлаган. Франция билан алоқаларнинг мустаҳкамланиши Германия учун муҳим ҳисобланади. Буюк Британия 2019 йилда иттифоқни тарк этар экан, Франция БМТ Хавфсизлик Кенгашидаги ягона вакили ва ядровий қуролга эга бўлган иттифоқдаги ягона мамлакат бўлиб қолади.

Маълумот учун, Европа Иттифоқи 1957 ва 1992 йиллардаги иттифоқ шартномалари асосида шаклланган бўлиб, иттифоқ шартномаларини ўзгартирлириш учун унга аъзо мамлакатлар розилиги керак бўлади.