Жаҳоннинг энг рақобатбардош иқтисодиётлари рейтингида Гонгконг биринчи ўринни эгаллади. Швейцариядаги Халқаро менежментни ривожлантириш институти  (IMD) тузган докладда бу келтирилган.

Рейтинг учлигида Швейцария ва Сингапурни кўриш мумкин. АҚШ бир поғона пастлаб тўртинчи ўринга тушди. Рўйхатнинг кейинги қаторларидан Нидерландия, Ирландия, Дания, Люксембург, Швеция ва Бирлашган Араб Амирликлари жой олди.

Хитой Буюк Британияни қувиб ўтиб, 25-ўриндан 18-ўринга чиқиб олган. Россия эса ўтган йилгидан 2 поғона пастлаб 46-ўринга тушган. Қозоғистон Россиядан юқорироқдадир. Малайзия ва Таиланд ҳам Осиёдаги рақобатбардош иқтисодиётга эга давлатлар қаторида эътироф этилган.

(Инфографика манбаси: www.bloombergquint.com)

63 мамлакатни ўз ичига олган рўйхатнинг охирида Бразилия, Мўғулистон ва Венесуэла турибди.

Мазкур рейтинг тўрт гуруҳга (иқтисодий кўрсаткичлар, ҳукуматнинг самарадорлиги, бизнес самарадорлиги, инфраструктура ҳолати) бўлинувчи 340 мезонга асосланиб тузилган. Докладни тайёрлашда статистик маълумотлар, жаҳон компаниялари раҳбарлари ўртасида ўтказилган сўровнома натижалари ҳисобга олинган.

IMD институти юқоридаги рейтинг билан бирга рақамли рақобатбардошлик соҳасидаги янги рейтингни ҳам тақдим этди. Бу соҳада етакчилар Сингапур, Швеция ва АҚШ деб топилди.