АҚШ президенти Дональд Трамп нефть нархини арзонлатгани учун Саудия Арабистонига миннатдорчилик билдирди. Трампнинг айтишича, Саудиянинг ҳаракатлари ортидан нефть нархи 82 доллардан 54 долларга тушган.

Саудия билан ҳамкорлик тўғрисда гапирар экан, Трамп 21 ноябрь куни журналистларга:

-Мен учун Америка биринчи ўринда туради. Биз ҳарбий буюртмалар учун юз миллиард долларлардан бош тортмоқчи эмасмиз, агар Саудиядан бош тортсак бу Россия ва Хитой учун совға бўлади. Саудия Арабистони билан алоқаларни узсак, нефть нархи кескин ўсиб кетади. Мен уларни ушлаб турибман. Улар бизга нефтни арзон нархда ушлаб туришга кўмак бермоқда. Мен нефть янада арзон бўлишини истайман, -деди Трамп.

Бундан олдинроқ АҚШ Конгресси журналист Жамол Хашогги ўлдирилиши ортидан Саудияга нисбатан кучлироқ жазо чоралари кўришни таклиф қилган эди. Бироқ Трамп Вашингтон етарлича жазо чоралари кўрганини айтиб, таклифни рад этган эди.

16 ноябрь куни Қўшма Штатлар журналист Жамол Ҳашшогини ўлдиришда иштирок этганликда гумонланаётган 17 нафар саудияликка нисбатан иқтисодий санкциялар жорий этган эди. Уларнинг орасида валиаҳд шаҳзода Муҳаммад бин Салмоннинг бош ёрдамчилари Сауд ал Қаҳтаний ва Моҳир Мутриб ҳам бор. АҚШ Қахтаний Хашоггининг ўлдириш режасига раҳбарлик қилганлардан бири бўлган, деб гумонламоқда.

Санкция жорий этилган шахсларнинг АҚШдаги бойликлари музлатилади ва АҚШ фуқароларига улар билан ҳамкорлик қилиш тақиқланади.

Аввалроқ Саудия ҳукмдорларига мухолиф қарашдаги журналист Хашогги 2 октябрь куни Истанбулдаги Саудия қироллиги консулхонаси биносида ўлдирилгани аниқлангани хабар қилинган эди. Агентликлар Хашшогини ўлдирганликда гумонланган 21 одам Саудияда қўлга олинганини билдирган.