АҚШ 2021 йил майига қадар ўз қўшинларини Афғонистондан бутунлай олиб чиқишни режалаштирмоқда. Давлат котиби Майк Помпео Сенатнинг ташқи алоқалар қўмитасида нутқ сўзлаганида, унинг якуний чиқиб кетиши кутилаётган вақт режаси ҳақида гапирди, дея хабар беради ТАСС. 

“Биз шартнома туздик. Биз нолга етамиз, кучларимизни у ердан олиб чиқамиз. Ўйлайманки, келаси йил май бўлади", - деб жавоб берди сиёсатчи Америка томони ва "Толибон" террорчилик ҳаракати ўртасидаги музокаралар ҳақида.

Помпеонинг таъкидлашича, ҳозирги пайтда АҚШ бу мамлакатдаги ҳарбий иштирокини икки баравар камайтирди.

29 феврал куни АҚШ ва Толибон Қатарнинг Доҳа шаҳрида бўлиб ўтган маросимда тинчлик сулҳи тузди. Ҳужжат Афғонистонда тинчликка олиб келиши керак. Помпео Толибонни "Ал-Қоида" билан алоқани узиш ва "Исломий давлат" га қарши курашни қўллаб-қувватлаш бўйича ваъдасини бажаришга чақирди.

Толибон 1994 йилда афғон уруши авжига чиққан пайтда ташкил топган эди. 1996-2001 йилларда Толибон мамлакатда ҳокимият тепасида эди ва 2001 йилда ағдарилгандан сўнг улар Афғонистон ва Покистонда ҳукумат ва НАТО кучлари билан партизан урушини бошладилар. Толибон ва ҳукумат ҳозирда сиёсий муросага эришиш йўлларини изламоқда.