Ҳокимлар ертўла тозалаш билан шуғулланадиган вақт ўтди – Президент

Ҳокимлар ертўла тозалаш билан шуғулланадиган вақт ўтди – Президент

Фото: president.uz

7 март куни Президент Шавкат Мирзиёев Тошкент шаҳрида амалга оширилиши режалаштирилган инвестиция лойиҳалари муҳокамасига бағишланган йиғилиш ўтказди.

Маълум қилинишича, Тошкентда 2020-2022 йилларда умумий қиймати 9 миллиард 884 миллион долларлик 762 та инвестиция лойиҳасини амалга ошириш режалаштирилган. Уларнинг 122 таси давлат дастури, 640 таси ҳудудий инвестиция дастурлари доирасидадир.

Фото: president.uz

Хусусан, саноат соҳасида 1 миллиард 890 миллион долларлик 242 та лойиҳа, хизмат кўрсатиш йўналишида 4 миллиард 966 миллион долларлик 337 лойиҳа амалга оширилиши мўлжалланган. Замонавий турар жой қурилиши бўйича 3 миллиард 328 миллион долларлик 183 та объект қурилиши кўзда тутилган.

– Инвестиция ва экспортдан мақсад – ишчи жой, қўшимча даромад. Тошкентда бу борада жуда катта ресурслар бор. Ҳозирча уларнинг ярмидан ҳам фойдаланилмаяпти. Шунинг учун ҳар бир туман кесимида кичик ва ўрта корхоналарни ўрганиб, ишлаб чиқариш ва экспорт имкониятларини кенгайтириш, халқимизга кафолатланган даромад манбайи яратиш керак, – деди Шавкат Мирзиёев йиғилишда.

2020 йилда жами 4,8 миллиард доллар инвестициялар ўзлаштирилиши натижасида 400 дан ортиқ лойиҳалар фойдаланишга топширилиши маълум қилинди. Булар доирасида 32050 та янги иш ўрни яратилиши режалаштирилган.

Шунингдек, 2020 йилда 710,5 миллион доллар миқдорида экспорт қилиниши мўлжалланган. Шундан қарийб 674 миллион доллари саноат маҳсулотлари, 36,5 миллион доллари мева-сабзавот маҳсулотларига тўғри келади.

– Олтиариқ тумани 120 миллион долларлик экспорт қиляпти. Тошкентдагидек саноат объектлари, коммуникация уларда йўқ. Пойтахтда зарур инфратузилма бор! Ҳокимлар ертўлани тозалаш билан шуғулланадиган вақт ўтди. Энди туман раҳбарлари тадбиркорликни ривожлантириб, тадбиркорларни айланма маблағлар билан таъминлаб, экспортига кўмаклашиб, улар билан манзилли ишлаши керак. Сизлар ўзгармас экансиз, вазият ўзгармайди, – дея таъкидлади Президент.

Шунингдек, йиғилишда инвестициялар жалб этиб, зарурат бўлса, ташқи бошқарувга бериб, саноатнинг янги йўналишларини йўлга қўйиш бўйича топшириқлар берилди.