Электрокарлар ишлаб чиқаришга асосланган Американинг Тесла компанияси узоқ кутилган электропикапни тақдим қилди. Ўзининг қиррали шакли ҳамда кулранг ва ноодатий кўриниши билан автомобил антиутопиядаги киберпанк машиналарга ўхшайди.
Янги пикап Cybertruck номини олган. Компания асосчиси Илон Маскнинг сўзларига кўра, пикапни яратишда у Жеймс Бонднинг “Мени севган жосус” филмидаги Lotus Espirit'нинг тюнинг вариантидан илҳомланган. Автомобил панели “қийшаймайди ва тирналмайди” ҳамда унинг ойналари зирҳланган.
Ишлаб чиқариш 2021 йилдан бошланади. Машинанинг нархи АҚШда $39 900 (ҳозирги курсда 380 миллион сўм)дан бошланади. Бир марталик қуввати 800 километрга етадиган версиясининг максимал нархи $69 900 (666 миллион сўм) бўлади.
HIS Markit таҳлилчилари электропикапларнинг йиллик сотуви 2026 йилга келиб йилига 75 минг донани ташкил этишини кутишмоқда (бозордаги жами пикаплар сони 3 миллион бўлади). Бу бозорда Тесланинг асосий рақобатчилари Форд ҳамда Генерал Моторс бўлади.
Киберпанк компютер эрасидаги технологик тараққиёт фонида инсоният маданиятининг таназзуллга юз тутаётганини акс эттирадиган илмий фантастика жанри ҳисобланади.