Душанба куни Париж метроси иккита йўналиши ҳайдовчилари президент Макроннинг пенсия тизимини тартибга солиш тўғрисидаги режасига қарши беш кундан бери давом етаётган касаба уюшмалари томонидан ташкиллаштирилган намойишчилар билан бирдамлигини кўрсатиш учун ҳафта охирига қадар иш ташлаш эълон қилдилар, деб ёзмоқда Reuters.

Ўтган ҳафта Макрон AҚШ ва Хитой каби дунёнинг қудратли давлатларига етиб олиш учун Францияда зарурий ижтимоий ҳамда иқтисодий ўзгаришларни амалга ошириш учун бор ақлий ва жисмоний қобилятини ишга солишини маълум қилган эди.

Оммавий норозиликлар транспорт тизимига жиддий зарба бўлди. Парижда поездлар, автобуслар ва метрода йўловчиларга хизмат кўрсатишда жиддий узилишлар рўй берди.

Бир неча ой давом этган маслаҳатлашувдан кейин президентнинг пенсия масалалари бўйича маслаҳатчиси Жон-Пол Делевой (Jean-Paul Delevoye) душанба куни бош вазир Эдуард Филип (Edouard Philippe)га бўлажак ўзгаришларни кўрсатишдан олдин касаба уюшмалари етакчилари билан учрашишни режалаштирмоқда.

“Улар бизни шунчаки эшитишини эмас, балки диққат билан тинглашларини инобатга оламиз”, - деди ишчилар умумконфедерацияси етакчиси Филип Мартинез (Philippe Martinez) France Info радиосига берган интервюсида.

Макрон турли хил имтиёзларга эга бўлган 40 дан ортиқ алоҳида пенсия режаларидан ташкил топган тартибсиз тизимни, ҳар бир евро учун ҳар бир пенсионер тенг ҳуқуқларга эга бўладиган ягона, балли тизим билан алмаштирмоқчи.

Касаба уюшмалари ўз ишчиларининг янада ёмон аҳволга тушиб қолишидан хавотирда, чунки мавжуд тизим шароитида давлат ушбу соҳадаги тўпланган пуллар ва тўланадиган пуллар ўртасидаги танқислик (дефицит)ни муттасил қоплайди.