Ўзбекистон Марказий банки жорий йилнинг 10 январида сўмда облигациялар чиқаришини маълум қилди.
Марказий банк матбуот хизмати хабарига кўра, жами 250 миллиард сўмлик облигациялар Ўзбекистон республика валюта биржасига жойлаштирилади. Бунда бир дона облигациянинг номинал қиймати 1 миллион сўмдан таклиф қилинмоқда.
Облигациялар қисқа муддатга – 180 кун (6 ой)га мўлжаллаб чиқарилмоқда.
Йиллик фоиз ставкаси 16%.
Хабарда шунингдек, аукцион савдоларида рақобатсиз буюртманомалар қабул қилинмаслиги алоҳида таъкидлаган.
2019 йилнинг феврал ойида Ўзбекистон мамлакат сифатида ўзининг давлат облигацияларини чиқарган эди. Йил охирига келиб Ўзбекистон банкларидан биринчи бўлиб “Ўзсаноатқурилишбанк” ўз облигацияларини чиқарган эди.
Иккала облигация ҳам Лондон биржасида чиқарилган эди. Марказий банк эса ўз савдоларни мамлакатимиздаги биржада ўтказаётгани билан эътиборга лойиқ.