Рим папаси руҳонийлар томонидан содир этилаётган бачабозликка қарши кураш чора-тадбирларини муҳокама қилиш учун Ватиканда жаҳондаги католик черковларининг лидерлари иштирокида анжуман ўтказди.
"Парвардигор бошқаруви остидаги халқ бизни кузатмоқда ва биздан очиқ-ойдин қоралашни эмас, балки аниқ ва самарали чораларни кутаяпти",-деди Рим папаси Франциск анжуманда.
Рим папаси 2018 йилнинг 20 августида илк маротаба Рим-католик черковида бачабозлик мавжудлигини тан олган ва жамоатчиликдан узр сўраган эди.
Ўтган йилнинг 15 август куни АҚШнинг Пенсильвания штати Ҳакамлар коллегияси 1950 йилдан бошлаб то шу кунгача католик черковининг 300 нафар руҳонийси штатнинг 6та епархиясида бир минг нафардан кўпроқ болаларни жинсий алоқа қилиб зўрлагани тўғрисидаги ҳужжатни эълон қилган.
Кейинроқ АҚШнинг Иллинойс штати прокуратураси сўнгги ўн йилликда 700 нафар католик руҳоний болаларга нисбатан жинсий зўравонлик қилгани тўғрисидаги ҳисоботни эълон қилган.
2018 йилнинг авгусида Ватиканнинг Вашингтондаги элчиси бўлган архиепископ Карло Марии Вигано Рим папаси экс-кардинал Теодор МакКаррикнинг жинсий алоқалари тўғрисидаги айбловларни “босди-босди” қилгани тўғрисида 11 саҳифали баёнотни эълон қилган ва папанинг истеъфосини талаб қилган эди.