Ким Жонг Намнинг жасади Шимолий Кореяга қайтарилиши Малайзия ва КХДР ўртасидаги дипломатик кескинлик юмшашига сабаб бўлди, дея хабар бермоқда Al Jazeera​ нашри.

Шимолий Корея раҳбари Ким Жон Иннинг ўгай акаси Ким Жонг Нам 13 февраль куни Куала-Лумпур аэропортида суиқасд қурбони бўлган эди. Ким Жонг Нам аэрпортда икки нафар аёл томонидан кимёвий заҳар билан ҳужум қилинган. Малайзия полицияси қотилликда гумон қилинган идонезиялик ва ветнамлик аёлларни ҳибсга олган.

Малайзия ҳуқуқ идоралари Куала-Лумпурдаги КХДР элчихонасини қотилларни яширишда айблаши ортидан иккала мамлакат ўртасидаги дипломатик муносабатлар совуқлашган. Дипломатларнинг қотилликда гумон қилиниши КХДРнинг ғазабини қўзғаган. Кескинлик кулминациясида Малайзия ҳукумати Шимолий Корея элчисининг мамлакатдан чиқиб кетишини талаб қилган. Бунга жавобан, КХДРдаги Малайзия фуқароларига мамлакатдан чиқиб кетиш тақиқланган. Малайзия ҳам КХДРга худди шундай чора билан жавоб қайтарган. Иккала мамлакатга қарши томон фуқаролари кириши ҳам маън этилган эди.

Малайзия бош вазири Нажиб Раззоқ иккала мамлакат ўртасидаги муносабатлар тиклангани ва тақиқлар бекор қилинганини маълум қилган. Ҳар икки мамлакат фуқароларига ўз ватанларига қайтиш учун рухсат берилган.

Таҳлилчилар мазкур «ярашув» дипломатик ихтилоф тугаганини англатишини айтишмоқда. Аммо кўпчилик КХДР-Малайзия муносабатлари аввалги даражага қайтмаслигини тахмин қилмоқда. «Малайзиялик дипломатларнинг Шимолий Кореяни тарк этиши дипломатик алоқалар тугатилганини англатади. Малайзиянинг Шимолий Корея бозорига қайтиши ҳали анча кечикиши мумкин», – дейди малайзиялик халқаро муносабатлар бўйича мутахассис Суфён Жусоҳ.

Шимолий Корея эълон қилган баёнотда эса икки томонлама алоқаларни яна юқори даражага олиб чиқиш ҳамда визасиз тизимни қайта амалга ошириш учун музокаралар ижобий якунлангани айтилган. КХДРнинг собиқ раҳбари Ким Жонг Илнинг ўғли ва ҳозирги раҳбарнинг акаси бўлган Ким Жонг Нам кўп маротаба оиласининг мамлакатда ўрнатган автократик сиёсатини танқид қилган эди. У умрининг охирги 15 йилини хорижда ўтказган. Шимолий Корея ҳукумати унинг ўлимига доир барча айбловларни рад этмоқда.