АҚШ ҳарбий-денгиз флоти кучлари Япония қирғоқлари яқинида бузуқ қайиқда сузиб юрган икки аёлни қутқаришга муваффақ бўлди, дея хабар бермоқда Guardian нашри.
Америкалик икки нафар аёл 3 май куни Ҳавайидан Таити томон қайиқда йўлга чиққан. Аммо ноқулай об-ҳаво туфайли қайиқнинг мотори ишламай қолган. Қайиқда бир йилга етадиган озиқ-овқат ҳамда Зевс лақабли ит бўлгани хабар қилинган. Улар салкам 6 ой давомида Тинч океанининг кимсасиз сувларида мақсадсиз сузишга мажбур бўлишган.
Женифер Аппел ва Таша Фуиаба чиққан қайиқ дастлаб Тайван балиқчилик кемаси томонидан топилган. Улар чоршанба куни Япония соҳилларидан қарийб бир ярим минг км масофада қутқарилган. Уларга тезлик билан тиббий ёрдам кўрсатилган. Оғир саёҳатга қарамасдан, иккала аёлнинг аҳволи яхши эканлиги айтилмоқда.
Узоқ давом этган денгиз саёҳатида омон қолганларнинг айтишича, уларнинг қутқарувчиларга хабар бериш бўйича уринишлари зое кетган. Қайиқда узоқ вақтда мўлжалланган, қадоқланган овқат маҳсулотлари ва денгиз сувини чучук сувга айлантирадиган қурилма борлиги туфайли улар омон қолишган.
Женифер Аппелнинг онаси Жойс Аппел айтишича, у қизи ва Таша Фуиаба бедарак кетгандан бир ҳафта ўтиб, бу ҳақида Ҳавайи соҳил кучларига хабар берган. Соҳил кучларининг бедарак кетган қайиқни қидириш ишлари самарасиз якунланган.