Endi xorijda ishlab chiqarilgan tovarlar davlat xaridlarida ishtirok etmaydi

Endi xorijda ishlab chiqarilgan tovarlar davlat xaridlarida ishtirok etmaydi

«Mahalliy ishlab chiqaruvchilarni qo‘llab-quvvatlashga doir qo‘shimcha chora-tadbirlar to‘g‘risida» Prezident qarori (PQ–4812-son, 21.08.2020 y.) qabul qilindi.

Qarorga muvofiq, 2020 yil 1 noyabrdan:

- ustav fondida davlat ulushi 50 foiz va undan ortiq bo‘lgan yuridik shaxslarning umumiy qiymati bazaviy hisoblash miqdorining 50 ming baravaridan yuqori bo‘lgan import tovarlari xaridlarining maqsadga muvofiqligi har chorakda kuzatuv kengashlari tomonidan majburiy tartibda ko‘rib chiqiladi;

- xorijda ishlab chiqarilgan alohida tovarlar, shuningdek, xorijiy shaxslar tomonidan bajariladigan ishlarning davlat xaridlaridagi ishtiroki vaqtinchalik taqiqlanadi va chegaralanadi;

Davlat xaridlaridagi ishtiroki vaqtinchalik taqiqlangan va chegaralangan, xorijda ishlab chiqarilgan tovarlar bo‘yicha tender (tanlov) ishtirokchilari takliflarini baholashda mahalliy ishlab chiqarilgan tovarlarga nisbatan import tovarlarining CIP (O‘zbekiston) narxidan 15 foizdan ko‘p bo‘lmagan miqdorda preferensiya beriladi.

2021 yil 1 yanvardan strategik ahamiyatga ega xo‘jalik jamiyatlari va korxonalar uchun tovarlar (ishlar, xizmatlar) xarid qilishning alohida tartiblari bekor qilinadi.

2020 yil 1 noyabrga qadar cooperation.uz portalida respublikada ishlab chiqarilayotgan barcha tovarlar (ishlar, xizmatlar)ning texnik ko‘rsatkichlari 10 ta raqamli TIF TN kodi va ishlab chiqaruvchilarga bog‘lanish ma’lumotlari bilan birgalikda joylashtiriladi.

2021 yil 1 yanvardan xorijiy mamlakatlarda xavfli mahsulotlar haqida tezkor xabar berish axborot tizimiga kiritilgan mahsulotlarni «erkin muomalaga chiqarish uchun» bojxona rejimiga rasmiylashtirish taqiqlanadi.

2021 yil 1 yanvarga qadar xalqaro, mintaqalararo va xorijiy standartlarni ularning asl tilidagi mahsulotga talablarni o‘zgartirmasdan xuddi shunday ko‘rinishda qabul qilish orqali, 1995 yilgacha tasdiqlangan 5 236 ta standartlar «tartibga soluvchi gilotina» usulida bekor qilinadi.

2021 yil 1 yanvargacha davlat investitsiyalarini boshqarishni baholashning umum qabul qilingan tamoyillari (PIMA) asosida markazlashgan manbalar hisobidan moliyalashtiriladigan investitsiyaviy loyihalarni to‘liq va uzluksiz monitoring qilish tizimi joriy qilinadi.

Qaror bilan, Davlat xaridlari sub’yektlarining xarid tizimini auditdan o‘tkazish jadvali tasdiqlandi.

Shuningdek, «Davlat xaridlari to‘g‘risida»gi Qonun loyihasi (yangi tahrirda) ishlab chiqiladi.