So‘nggi ma’lumotlarga ko‘ra, Buyuk Britaniyada koronavirus infeksiyasini yuqtirib olganlar soni 8 mingdan oshib ketdi. Pandemiya natijasida vafot etganlar 422 nafarni tashkil qilmoqda.

Shu sababli, Buyuk Britaniya bosh vaziri Boris Jonson 23 mart, dushanba kuni mamlakatda yaqin uch haftalik muddatda qat’iy karantin choralari o‘rnatilganini e’lon qildi.

Mamlakat aholisiga uyda qolishga buyruq berildi, faqat zaruriy hollarda – oziq-ovqat, tibbiy yordam, sport bilan shug‘ullanish (kuniga ko‘pi bilan bir marta) va uydan turib ishlash mumkin bo‘lmaganda ishga borish uchun ko‘chaga chiqishga ruxsat etiladi.

Oziq-ovqat va asosiy ehtiyot mollarini sotadigan do‘konlardan boshqa barcha savdo nuqtalari, ijtimoiy ob’yektlar, sport maydonlari va barcha diniy ibodatxonalar yopildi. Ko‘chada ikki kishidan ko‘p odam to‘planadigan har qanday yig‘ilishlar taqiqlandi.

Politsiyaga ushbu qoidalarga amal qilmaganlarga jarima solish ko‘rsatmasi berilgan.

Buyuk Britaniyada shu paytgacha tinchlik davrida bunday qonunlar qabul qilinmagan.