Yaqinda ijtimoiy tarmoqlar orqali maktablarda koronavirus bilan bog‘liq vaziyat tufayli 15 mart kunidan boshlab ta’til e’lon qilinishi haqida ma’lumotlar tarqaldi. Ko‘pchilik bu xabarlar rost yoki yolg‘on ekanligini so‘rashni boshladi.
O‘zbekiston Respublikasi Xalq ta’limi vazirligi matbuot kotibi Anvar Umarov mazkur tarqatilgan ma’lumot noto‘g‘riligini ma’lum qildi.
Rasman xabar berilishicha, o‘quvchilar o‘tgan yillarida bo‘lganidek, 21 mart kunidan navbatdagi ta’tilga chiqadi. Ta’til yetti kun davom etadi.
Shuningdek, Xalq ta’limi vazirligi Sog‘liqni saqlash vazirligi huzuridagi Sanitariya-epidemiologik osoyishtalik agentligi bilan doimo aloqada ekanligi ma’lum qildi.
Xalq ta’limi vazirligi va Sog‘liqni saqlash vazirligi maktablarda koronavirus tarqalishini oldini olishga qaratilgan chora tadbirlarni kuchaytirish bo‘yicha qo‘shma qaror qabul qilgan. O‘zbekiston Sog‘liqni saqlash vazirligi Jahon sog‘liqni saqlash tashkiloti bilan hamkorlikda koronavirus infeksiyasini oldini olish borasidagi tavsiyalarini posterlar shaklida chop etdi va ular maktablarga tarqatildi.
MAVZUGA DOIR: «Qani endi, ta’lim sifatini yaxshilash bo‘yicha qarorlarni ham shunchalik jon kuydirib ijro etishsa»
Xalq ta’limi vazirligi zaruriyat tug‘ilganda vaziyat rivojlanishi haqidagi ma’lumotlarni e’lon qilib borishini aytib o‘tdi.