O‘zbekistonda Turkiyaning “Gebze” maxsus sanoat zonasining filialini tashkil qilinishi mumkin. Ushbu masala Anqarada bo‘lib o‘tgan Turkiya vitse-prezidenti F.Oktay hamda O‘zbekiston Investitsiyalar va tashqi savdo vaziri S.Umurzoqov o‘rtasidagi uchrashuvda muhokama qilindi.
“Tomonlarning diqqat markazida investitsiyaviy hamkorlikni jadallashtirish va o‘zaro savdo nomenklaturasini kengaytirish nuqtai nazaridan iqtisodiy munosabatlarni kuchaytirish masalalari bo‘ldi”, — deyiladi vazirlik xabarida.
Shuningdek, transport va yuk tashish sohalarida tizimli o‘zaro munosabatlar, Turkiya hukumati tomonidan texnik ko‘mak berish va imtiyozli kreditlash dasturlari doirasida o‘zaro hamkorlikni rivojlantirish masalalariga to‘htalib o‘tildi.
O‘zbekiston Respublikasi va Turkiya Respublikasi o‘rtasidagi Imtiyozli savdo to‘g‘risidagi kelishuvini imzolashga tayyorgarlikni jadallashtirish va mazkur bitimga kiritilishi taklif etilayotgan tovarlar pozitsiyalarini kengaytirish masalalari o‘rganildi hamda uni amalda qo‘llash tartiblari kelishib olindi. Mazkur choralar Turkiya va O‘zbekiston respublikalarining o‘zaro savdo aylanmasini 5 milliard dollarga yetkazish borasida ikki mamlakat Prezidentlari tomonidan berilgan topshiriqni amalga oshirilishiga katta ko‘mak berishi kutilmoqda.