Turkiya prezidenti Rejep Tayip Erdog‘an muxolifatdagi Xalq-respublika partiyasi (XRP)ning parlamentdagi fraksiyasi rahbari o‘rinbosari Engin Ozkochni sudga berdi va haqorat qilgani uchun undan 1 million turk lirasi (taxminan 165 ming dollar) miqdorida tovon puli talab qildi, deb xabar bermoqda RIA Novosti.
Avvalroq Ozkoch Erdog‘anni o‘lgan turk harbiylari haqida gapirganda "kelle" so‘zini ishlatganlikda va xiyonat qilganlikda ayblagan. Prezidentning bolalari harbiy xizmatdan bosh tortganini qo‘shimcha qilgan.
Ozkochning bu bayonoti tufayli chorshanba kuni Turkiya parlamentida hukmron Adolat va taraqqiyot partiyasi va XRP deputatlari o‘rtasida ommaviy mushtlashuv bo‘lib o‘tdi.
Jang natijasida besh kishi tan jarohati oldi. Ulardan ikkitasining boshiga tantanalarda foydalaniladigan bolg‘adan zarba berilgan va kasalxonaga yotqizilgan.
"Hurriyet" gazetasining yozishicha, Anqara Bosh prokuraturasi "prezidentni haqorat qilish" bo‘yicha Ozkoch ustidan tergov boshlagan.