Bahrayn Isroilni tan olgan to‘rtinchi arab davlati bo‘ldi. Bir oy oldin Birlashgan Arab Amirliklari bu ishni amalga oshirgan edi. 

Ikki davlatning diplomatik aloqa o‘rnatishda bu safar ham AQSh vositachilik qildi. AQSh prezidenti Donald Tramp bu haqda Tvitterdagi sahifasida yozdi.

Joint Statement of the United States, the Kingdom of Bahrain, and the State of Israel pic.twitter.com/xMquRkGtpM

— Donald J. Trump (@realDonaldTrump) September 11, 2020

Isroil, Bahrayn va Qo‘shma Shtatlarning qo‘shma bayonotida ushbu kelishuv "Yaqin Sharqda tinchlikka erishish uchun tarixiy yutuq" ekanligi ta’kidlangan. Diplomatik hujjatlarni imzolash marosimi 15 sentyabr kuni Vashingtonda bo‘lib o‘tadi.

Associated Press nashrining ta’kidlashicha, Falastinda Bahraynning xatti-harakatlari tanqid qilinib, bu "Quddus va falastinliklarga xiyonat" deb ataldi.

Avgust oyi o‘rtalarida, Trampning vositachiligidagi shunga o‘xshash bitim doirasida Birlashgan Arab Amirliklari Isroil bilan munosabatlarni normallashtirishga rozi bo‘lgan edi.

Arab dunyosining aksariyat davlatlari hanuzgacha Isroilni tan olmagan. Birlashgan Arab Amirliklari va Bahrayndan oldin bu ishni 1979 va 1994 yillarda mos ravishda Misr va Iordaniya amalga oshirgan.